ప్రథమ స్కంధము 176 - 184

* * *

శ్రీకృష్ణుడుత్తరా గర్భస్థుండగు పరీక్షితునిఁ దన చక్రంబుచే రక్షించుట

* * *

వ. 176
అంత వాసుదేవుండు వ్యాసప్రముఖ భూసురపూజితుండై, యుద్ధవ సాత్యకులు గొలువ, ద్వారకాగమున ప్రయత్నంబునఁ బాండవుల వీడ్కొని, రథారోహణఁబు సేయు సమయంబునఁ దత్తరపడుచు నుత్తర సనుదెంచి కల్యాణగుణోత్తరుండైన హరి కిట్లనియె.

మ. 177
ఇదె కాలానల తుల్యమైన విశిఖం బేతెంచె దేవేశ! నేఁ
డుదరాంతర్గత గర్భదాహమునకై యుగ్రాకృతిన్ వచ్చుచు
న్నది దుర్లోక్యము మానుపన్ శరణ మన్యం బేమియు లేదు నీ
పదపద్మంబులె కాని యెం డెఱుఁగ నీ బాణాగ్ని వారింపవే.

క. 178
దుర్భర బాణానలమున, గర్భములో నున్న శిశువు ఘన సంతాపా
విర్భావంబును బొందెడి, నిర్భర కృపఁ గావుమయ్య! నిఖిలస్తుత్యా!

క. 179
చెల్లెలి కోడల నీ మే, నల్లుఁడు శత్రువులచేత హతుఁడయ్యెను సం
పుల్లరవిందలోచన!, భల్లాగ్ని నణించి శిశువు బ్రతికింపఁగదే.

ఆ. 180
గర్భమందుఁ గమలగర్బాండ శతములు, నిముడుకొన నటించు నీశ్వరేశ!
నీకు నొక్క మానినీ గర్భరక్షణ, మెంత బరువు నిర్వహింతు గాక.

వ. 181
అనిన నాశ్రితవత్సలుండైన పరమేశ్వరుండు స్భద్రకోడలి దీనాలాపంబు
లవధరించి, యిది ద్రోణనందనుండు లోకమంతయు నపాండవంబయ్యెడు
నని యేసిన దివ్యాస్త్రమని యెఱింగె. అంతఁ బాండవుల కభిముఖంబై,
ద్రోణనందను దివ్యాస్త్ర నిర్గత నిశిత మార్గణంబు డగ్గాఱిన బెగ్గడీలక,
వారును ప్రత్యస్త్రంబు లందుకొని పెనంగు సమయంబున

మ. 182
తన సేవారతిచింత గాని పరచింతా లేశము లేని స
జ్జనులం బాండుతనూజుల మనువు వాత్సల్యంబుతో ద్రోణనం
దను బ్రహ్మాస్త్రము నడ్డపెట్టఁ బనిచెన్ దైత్యారి సర్వారి సా
దన నిర్వక్రము రక్షితాఖిల సుధాంధశ్చక్రముం జక్రమున్.

మ. 183
సకల ప్రాణి హృదంతరాళముల భాస్వజ్జ్యోతియై యుండు సూ
క్ష్మకళుం డచ్యుతుఁ డయ్యెడన్ విరటజా గర్భంబుఁ దాఁ జక్రహ
స్తకుఁడై వైష్ణవమాయ గప్పి కురుసంతానార్ధియై యడ్డమై
ప్రకటస్ఫూర్తి నణించె ద్రోణతనయ బ్రహ్మాస్త్రమున్ లీలతోన్.

వ. 184
ఇట్లు ద్రోణతనయుం డేసిన ప్రతిక్రియా రహితంబైన, బ్రహ్మశిరం
బనియెడి దివ్యాస్త్రంబు వైష్ణవతేజంబున నిరర్ధకం బయ్యె. నిజమాయా
విలసనమున సకల లోక సర్గస్థితి సంహారంబు లాచరించునట్టి
హరికి, ధరణీసుర బాణ నివారణంబు విచిత్రంబుగాదు.
తత్సమయంబున సంతసించి, పాండవ పాంచాల పుత్రికా సహితమై
గొంతి, గమనోన్ముఖుండైన హరిం జేరవచ్చి యిట్లనియె.