ప్రథమ స్కంధము - 71-79

-:శ్రీమద్భాగవత రచనాది వృత్తాంతములు:-

సీ.71
పుణ్యకీర్తును(డైన భువనేశుచరితంబు బ్రహ్మతుల్యంబైన భాగవతము
సకలపురాణరాజము దొల్లి లోకభద్రముగ( బుణ్యముగ మోదముగ( బ్రీతి
భగవంతు(డగు వ్యాసభట్టారకు( డొనర్చి శుకు( డనియెడు తన సుతునిచేత(
జదివించె నింతయు సకల వేదేతిహాసములోపలనెల్ల సారమైన

ఆ.72
యీ పురాణమెల్ల నెలమి నా శుకయొగి, గంగనడుమవచ్చి ఘనవిరక్తి
యోదవి మునులతోడ నుపవిష్టు(డగు పరీ, క్షిన్న(రేంద్రు(డడుగ( జెప్పవిను(డు.

అధ్యాయము - 4

శా.73
సూతా! యే యుగవేళ నేమిటికి నెచ్చోటన్ మునిశ్రేష్ఠు నే
శ్రోతల్ గోరిరి యేమి హేతువనకై శోధించి లోకైకవి
ఖ్యాతి వ్యాసు(డు మున్ను భాగవముం గల్పించె( దత్పుత్రు(డే
ప్రీతిన్ రాజున కీ పురాణకథ( జెప్పెన్ జెప్పవే యంతయున్.

వ.74
బుధేంద్రా! వ్యాసపుత్రుండైన సుకుండను మహాయోగి సమదర్శనుం డేకాంతమతిమాయాశయనంబువలనం దెలిసినవా(డు గూఢుండు మూఢునిక్రియ నుండు నిరస్తఖేదుం డదియునుంగాక.

తరల. 75
శుకుడు గో(చియులేక పై(జన(జూచి తోయములందు ల
జ్జకు( జలింపక చీరలొల్లక చల్లులాడెడి దేవక
న్యకలు "హా శుక" యంచు వెన్క( జనంగ వ్యాసుని( జూచి యం
శకములన్ ధరియించి సిగ్గున స్రుక్కిరందఱు ధీనిధీ!

సీ. 76
పాండవ వంశంబు బలము మానంబును వర్ధిల్ల గడిమి నెవ్వా(డు మనియె(
బరిపంథిరాజులు భర్మాదిధనముల నర్చింతు రెవ్వని యంఘ్రియుగము
గుంభజకర్ణాది కురుభటవ్యూహంబు సొచ్చి చెండాడె నే శూరతండ్రి
గాంగేయసైనికాక్రాంత గోవర్గంబు విడిపించి తెచ్చె నే వీరుతాత

ఆ. 77
యట్టి గాఢకీర్తి యగు పరీక్షిన్మహా, రాజు విడువ(దగని రాజ్యలక్ష్మి(
బరిహరించి గంగ(బ్రాయోపవిష్ణు(డై, యసువులుండ నేల యడ(గియుండె?

ఉ. 78
ఉత్తమకీర్తులైన మనుజోత్తము లాత్మహితంబు లెన్న(డున్
జిత్తములందు( గోరరు హసించుయు, లోకులకెల్ల నర్థసం
పత్తియు భూతియున్ సుఖము భద్రము( గోరుదు రన్యరక్షణా
త్యుత్తమమైనమేను విభు(డూరక యేల విరక్తి ద్రాసెనో.

క. 79.
సారముల నెల్ల నెఱు(గుదు, పారగు(డవు భాషలందు బహువిధకథనో
దారు(డవు మాకు సర్వము(, బారము ముట్టంగ( దెలియ( బలుకు మహత్మా?

ప్రథమ స్కంధము - 60-70

-: భగవంతుని యేకవింశత్యవతారములు :-

సీ.
మహదానందకార తన్మాత్ర సమ్యుక్తుడై చారుషొడశకళా సహితు(డగుచు(
బంచమహాభూత భాసితుండై శుద్ధసత్త్వుడై సర్వాతిశాయి యగుచు(
జరణోరుభుజముఖ శ్రవణాక్షినాసా శిరములు నానాసహస్రములు వెలు(గ
సంబరకేయూర హారకుండలికి రీటాదులు పెక్కువే లమరుచుండ(

తే.60.
బురుషరూపంబు ధరియించు పరు(డనంతు(, డఖిలభువనైక కర్తయై యలఘుగతిని
మానితాపార జలరాశిమధ్యమునను, యోగనిద్రావిలాసియై యొప్పచుండు.

వ.61.
మ.62.
సరసిం బాసిన వేయుకాలువల యోజన్ విష్ణునందైన శ్రీ
కర నానా ప్రకటావతారము లసంఖ్యాతంబు లుర్వీశులున్
సురలున్ బ్రాహ్మణ సమ్యమీంద్రులు మహర్షుల్ విష్ణునంశంసముల్
హరి కృష్ణుండు బలానుజన్మ( డెడలె దావిష్ణు(డా నేర్పడన్.

క.63.
భగవంతుడు విష్ణువు, జగముల కెవ్వేళ రాక్షసవ్యథ గలుగున్
దగనవ్వెళల దయతో, యుగయుగమున( బుట్టి కాచునుద్యల్లీలన్.

ఆ.64.
అతిరహస్యమైన హరిజన్మకథనంబు, మనుజు(డెవ్వ(డేని మాపురేపు(
జాలభక్తితోడ( జదివిన సంసార, దుఃఖరాశి( బాసి తొలగిపోవు.

వ.65.

చ.66.
జననములేక కర్మముజాడల(బోక సమస్తచిత్త వ
ర్తను(డగు చక్రికిన్ గవు లుదారపదంబుల జన్మకర్మముల్
వినుతుల్ సేయుచుండుదురు వేదరహస్యములందు నెందు(జూ
చిన మఱిలేవు జీవునికి(జెప్పినకైవడి జన్మకర్మముల్.

మ.67.
భువనశ్రేణి నమోఘలీలు(డగుచున్ బుట్టించు రక్షించు నం
తవిధింజేయు మునుంగ(డందు బహుభూతవ్రాతమందాత్మతం
త్ర విహారస్థితు(డై షడింద్రియ సమస్తప్రీతియున్ దవ్వులన్
దివిభంగింగొను( జిక్క(డింద్రియములన్ ద్రిప్పున్ నిబంధించుచున్.

చ.68.
జగదధినాథు(డైన హరి సంతతలీలలు నామరూపముల్
దగిలి మనోవచోగతుల( దార్కికచాతురి యెంతగల్గినన్
మిగిలి కుతుర్కవాది దగ మేరలుచేసి యెఱుంగనేర్చునే
యగణిత నర్తక్రమము నజ్ఞు(డెఱింగి నుతింపనోపునే.

ఉ.69.
ఇంచుక మాయలేక మది నెప్పుడు వాయని భక్తితోడ వ
ర్తించుచు నెవ్వడేని హరి దివ్యపదాంబుజ గంధరాశి సే
వించు నతం డెఱుంగు నరవిందభవాదులకైన దుర్లభో
దంచితమైన యా హరి యుదార మహాద్భుత కర్మమార్గముల్.

మ.70.
హరిపాదద్వయభక్తి మీవలన నిట్ల్లరూఢమై యుండునే
తిరుగంబాఱదు చిత్తవృత్తి హరిపై దీపించి మీ లోపలన్
ధరణీదేవతలార! మీరలు మహాధన్యుల్ సమస్తజ్ఞులున్
హరిచింతన్ మిము(జెంద వెన్న(డును జన్మాంతర్వ్యథాయోగముల్.